CALL : +685 24414
FAX 20429
5th Floor John Williams Building
Tamaligi, Apia
Admin : cccsit@cccs.org.ws
Tusi Faitau: 1 Timote 6:1-10
Matua: 1 Timoteo 6:6-7
“A’o le amio Atua ma le loto malie, o le oloa tele lava lea. Aua tatou te lei aumai lava se mea e tasi i le lalolagi, ua mautinoa foi tatou te le mafai ona ave ese ai o se mea”
(But godliness with contentment is great gain. For we brought nothing into the world, and we take nothing out of it).
Manatu Autu: Luitau ma le faamalieina (Challenge and contentment).
Taua tele le amio Atua (godliness) i soo se tagata o le sosaiete. Pe pologa lava, ae a amioatua, e iloa lelei e le pologa lona tulaga ma lona faasinomaga. E galue foi le pologa e tusa ma aiaiga o lona valaauina e fai ma pologa. Pe luitauina lana galuega, ae tumau i le faamaoni. Aisea? Aua ua lautua i le ola le amioatua.
E leai se lotomalie pe a leai se amioatua. Pei e o faatasi lava mea ia e lua. O a mea ua foai e le Alii i ou lima; o a taleni ma tofiga ma tulaga eseese ua valaauina iai so o se tagata, e galue lava ma le loto malie. Aisea, fai mai Paulo ia Timoteo, o mea ia e lua o le oloa tele lava lea.
Upu a le tasi faifeau, e fua le taleni e tuuina atu i se tasi i le mafai o loo ia te ia. E leai se loto malie i se matai e oo i se pologa pe a le faatuatua ma amioatua. Pau le mea e alia’e mai, a le o le sauaina e le matai o le pologa, ia o le lē ava o le pologa i le matai.
Tāua tele le amioatua ma le faatuatua i le ekalesia, auā e ta’u usoina ai e le tasi le isi. O le amioatua ma le faatuatua e luitauina i faaosoosoga, ma tofotofoga eseese i le faatinoina o se valaauina. A oo foi ina manumaloina e le alii o le lalolagi le ola, ia ona alia’e mai lea o le loto fefete, o le suesue e tupu ai le mataua, misa, upu faaleaga, ma masalosalo leaga; ia ma le manao le faamalieina e fano ma malaia ai.
Taua le luitauina o le soifua faatuatua; a leai se luitau e le iloa se faatuatua. Teu fatu le oloa tele – o le amioatua ma le loto malie ua mamanuina ai e le Atua le tagata e leai ma se mea na fanau mai ma ia – ina ia ola fiafia ma talia ma le lotomalie ma le loto faafetai mea lelei uma ua foaina e le Atua ia te ia. O a foi luitau o le ola, ia lagona pea le loto faamalieina – aua e gata lo tatou malosi, ae faaauau ma faaatoatoa e lo tatou Alii Faaola o Iesu Keriso i lana pule ma lona mana silisiliese so tatou taumafai.
Manuia tele le faaiuga o le vaiaso, ma ia i le Atua pea lona lava viiga nei seia oo i le faavavau.
Anzac Tuala (FS)
.………………………………………
© 2024 CCCS