CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: 1 Timoteo 1:18-2:15

Matua: 2:1-2

“O lenei e muamua i mea uma, ou te apoapoai atu ia faia olega, ma tatalo, ma faatoga, ma faafetai mo tagata uma lava; mo tupu ma i latou uma ua iai le pule, ina ia tatou nonofo ma le le atuatuvale ma le filemu, i le amio Atua uma lava ma le amio matagofie”

(I urge, then, first of all, that petitions, prayers, intercession and thanksgiving be made for all people – for kings and all those in authority, that we may live peaceful and quite lives in all godliness and holiness).

Manatu Autu: O se faafitauli faalotoifale (A local difficulty)

Tele faafitauli faalotoifale i nei aso. O le sauaina o tina ma fanau; o le faamasino o aiga i fanua ma suafa; o le aganuu faaaloalo i le va o matua ma fanau ua tau mou atu; o taimi o tapuaiga afiafi ma taeao i aiga ua seasea ona toe faia e le gata mo le viiga o le Atua ae mo le aoaoina o fanau o aso nei auā le lumanai. E le gata i aiga, a’o le ata (image) o le tane ma le fafine i le aiga o le Atua – le ekalesia.

Tele faafitauli faalotoifale o le ekalesia i Efeso – aemaise o le ata o le tane ma le fafine i lana aganuu ma lana tapuaiga i tupua ma faatusa sa ola a’e ai i Efeso, ma le ituaiga olaga fou ia foliga iai ina ua fai ma kerisiano.

E le faigofie ona sui le amio ma le olaga sa masani ai tagata e oo foi io tatou tagata ina ua oo mai le Talalelei. Tau tinei le amio faanuupo ma amioga faalelalolagi o le fetauai ma le saili poo ai e malosi; o ai e pule, a ia ola fealofani ma amanaia e le tasi le malosiaga o le isi i tiute ma nafa ma agavaa ua foaiina iai e le Atua e fefaasoaai ai ma fetausiai ai mo le manuia o tagata uma aemaise le Talalelei a le Atua.

E le au faailo nafa o tina i la ta aganuu ma le Talalelei. Oi latou o pae ma auli; ua iloga foi le matagofie o lo latou sao mo aiga, nuu, faalapotopotoga le malo faapea foi le ekalesia. O la latou amio, ia ua lautua le Talalelei a Keriso i o latou nafa tausi ma tiute tauave. Poo le tina poo tama   ua tutusa uma o la tiute tauave mo le aiga ma nuu, malo ma le ekalesia Atua  - ua fai ma viiga o le Atua.

Tatou faamalosi faatasi la tatou olega, la tatou tatalo ma faatoga ma faafetai mo o tatou taitai tama ma tina ua totofi i tulaga ua iai le pule - ina ia tatou ola i se Samoa filemu ma manuia e leai se atuatuvale, ina ua uluulu matafolau le amioatua uma lava ma le amio matagofie, i le soifau ma ola o tatou tagata – ma faasili ai le viiga o Keriso lo tatou Puluvaga.

Ia i le Atua pea le viiga e faavavau. 

Anzac Tuala (FS) 

.………………………………………