CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Luka 19:28-48

Matua: Luka 19: 36-38

‘O maliu ane o ia, ‘ā ua ō latou fofola ō latou ofu i le ala. Ua latalata o ia ua i le ifoa’i o le mauga o Olive, ona afua ai lea o le olioli o le au so’o uma e to’atele, ua latou vivii atu i le Atua ma le leo tele, auā o vavega uma na vaaia ei latou; ua faapea ane, “Ia manuia le tupu o lo o maliu mai le suafa o le Alii; o le manuia i le lagi, o le viiga foi i mea aupitoaluga”.

Manatu autu: Ulufale manumalo (Triumphal entry)

O le ulufale manumalo e manatua ai le fo’i mai o le tupu o Saulo ma Isaraelu ina ua faatoilaloina le toa malosi o Filisitia, na o mai ai fafine mai aai uma o Isaraelu ua pepese, ma sisiva ma faafetaia’i i le tupu o Saulo ma topa, ma le olioli, ma apa tagitagi, ua lagi fetalia’i fafine ia latou siva ua fai ane, “Ua fasia e Saulo ana to’aafe, a o Tavita ana sefulu o afe”. (I. Samuelu 18: 6,7).

O le ulufale manumalo – na ita ai le tupu o Saulo, e tusa ma le pese a fafine ua ia faalogo i ai, ua 1 mo ia a o Tavita e 10, o lona uiga ua ave uma e Tavita le malo, na afua mai ai i lea lava aso ona lamalama Saulo ia Tavita.  A o le manumalo – e le i faia i se malosi ma ni a’upega masani o le taua, a o le manumalo ua faia e le Atua mo lona nuu. O le manumalo o Isaraelu ia Filisitia – o le manumalo o le Atua ma ona tagata i le leaga; ia faato’ilaloina le tagata tuai le tagata faamaualuga ma le loto fefete, le tagata fia sili ma fia ta’uta’ua, le tagata le alofa ma fouvale i le Atua; e le gata ia Filisitia a o Isaraelu foi ia ma ona tagata aemaise le tupu o Saulo na filifilia e le Atua e fai ma ulua’i tupu o lona nuu.

O le ulufale manumalo o Isaraelu e le manaomia ai ni taavale auro ma ni solofanua malolosi e nofo ai le tupu i luga ma ni fitafita e faafeao le afio atu o le tupu, ae faapei ona fai mai Sakaria, “Ia e matuā fiafia oe le tama fafine a Siona, ia alaga fiafia oe le tama fafine a Ierusalema; faauta o le a alu atu lou Tupu ia te oe; o ia o le amiotonu ma le faaola; e agamalu o ia, o lo o tietie i le asini..na te faaumatia le kariota..ma le solofanua..ma le aufana o le taua; na te tautala foi i le leleiga i nuuese; o lana pule e pau mai..e oo i tuluiga o le lalolagi”.

O le ulufale manumalo ua faamatalaina e Luka – o le taunuuga lena o le valoaga a le perofeta o Sakaria; o le Tupu o tupu ma le Alii o alii ae le o se kariota po o se taavale auro po o se solofanua na ia fa’aaogaina ae ua na o le tamai asini – o le faailoga o lē aumai le filemu ma le manuia;  o lē ua afio mai e pule ma nofo tupu io tatou loto ma mafaufau.

Na utu le toto masa’a ma le fevataua’i o Samoa ina ua ulufale mai le Talalelei io ta laufanua; o le ulufale manumalo, lea ua faavae ai lo ta malo i le Atua o le Talalelei. Po o ai le pati o le a ulufale manumalo mai e taitai Samoa, i le amiotonu, ma faatumau le filemu o le Alii i le va o tagata; e fai ma savali o le leleiga io ta tagata; e agamalu ma fai ma aao laveai ma faaola o le Alii mo Samoa ma ona tagata i lenei vaitau o faama’i ua fano ai nisi o nai alo ma fanau; tatou saili i le Atua i le tatalo ma le faatuatua e na te faaulufale manumalo mai se vaega faaupufai e tusa ma lona finagalo ina ia tatou folau e faamoemoe i le Atua ae le o so tatou malosi ma ni togafiti ma ni ala faaletagata e le o atagia ai le amiotonu ma le alofa le faatuaoia o le Atua mo tagata uma.

Tumau i le Atua lona lava viiga e faavavau – ona o Iesu amene!

                                                                                                                     Anzac Tuala FS (Ofisa Failautusi Aoao) 

                                                                                                                                                                             ………………………………………