CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau- Teuteronome 15:7-11.

O le Lauga ile Suafa mamalu ole Atua le Tama, le Alo ma le Agaga Paia. Amene.

E fia faaaogaina le fuaiupu e 10 ma le 11 ole Tusi o Teuteronome sa faitauina  e fai ma au’au o mafaufauga faa le agaga e faitauina e faapea.

E te matuậ avatu lava ia te ia, ‘aua lava nei e avatu ia te ia ma le tiga o lou loto auậ o lenei mea, e faamanuia ai oe e lou Alii lou Atua i au galuega uma ma mea uma lava e tago iai ou lima. Auậ e le aunoa ona iai ile nuu ole tagata mativa, ole mea lea ou te fai atu ai ia te oe, o loo faapea atu, ia e matuậ faamafola atu lou lima i lou uso, i le ua tigaina, ma le ua mativa e ia te oe i lou nuu.

O le manatu autu o lenei aso e tusa ma le taiala a le Tusi Faitauaso e faapea. Agalelei atu i e mativa.   

O le agalelei ile mativa ole alofa atu, faasoa atu, tufa atu ma fesoasoani atu ile uso poo le tagata e lima vaivai ma mativa ile olaga ole tino nei,

Poo le fai ose galuega mase fesoasoani faale agaga iai latou foi o loo galala ma mativa le ola faale agaga ile Talalelei poo le Malo o le Atua.

O le Tusi lenei o Teuteronome o le faailoaina o lauga ma apoapoaiga a Mose ia Isaraelu ao agai atu ile nuu folafolaina e pei ole tusi sa faitauina.

O le faamalosi a Mose ile nuu ona o lea ua fai ma vaisu le naunau ile ai poo le taumafa ao iai ile ola pologa ile malaga umi ile vao.

Sa faalagolago ile manai mai le lagi na foai mai e le Atua, O lea ua taunuu ile nuu folafolaina ua tele taumafa ma manuia, ua tele foi fanua e galulue ai. Ae le gata i lea ua latou faia foi malologa ile aso fitu ole vaiaso.

Peitai ua silafia e le Atua le ala o loo taumafai mai ai nisi e faatupu le agasala ina ia tupu tele ina ua maua le tamaoaiga.

Ae ua maua ai loa ile vaivaiga ole leai ose alofa ma tusitusilima i nai tagata matitiva. Ua faumalo lagona ole musu e fesoasoani ma faasoa atu ona ua faaloloto ma manao ia saga faatupu le tamaoaiga,

Peitai , o lea ua faasoa manino atu Mose ia Isaraelu ile taua ole faamafola atu o lou lima foai mo lou uso mativa e pei ole fuaiupu ua fai ma Matua.

 O lona uiga ‘aua ete aiủ ma e limamau i nai tagata matitiva. A faamuamua ia te oe le alofa faa le Atua ole alofa e le faatuaoia, ole faailoga lena ole tagata  faatuatua moni ile Atua.

Ose faamalosi foi mo le tatou ola tautua o aso uma. O le mea moni e toatele i latou e tele le tamaoaiga ua mafuli ile vaivaiga lea seiloga e galue le tagata mativa mose taui ona faatoa alofa lea.

E manatua le tala ile auauna foi lea na faatalitali mole afio atu o Iesu i lona fale sei talimalo ai. Ae faa 3 ona afe atu Iesu e foliga ole tagata fiaai, fia maua se tupe ma le tagata ma’i ae ia tulia i fafo.

Fai mai le tala a Iesu na fetalai iai ina ua alu loa lana savaliga. Le taulealea e, o lou le taliaina ma e agaleaga iai latou nei e pei ona afe atu i lou fale, o ia lava lea ua ia faia iai. Ua gau atoa le taimi umi na faatali ai Iesu, ae ua faalumaina talu le le alofa.

E taua le alofa atu i e matitiva ma faatino ma le loto fiafia moni auậ o le Atua lava lea ua tatou faia ma alofa atu iai.

Manuia galuega amata o lenei vaiaso. Fai mai Iesu, e lei sau mo e malolosi ma maloloina, ae mo e mamai, vaivai ma e matitiva ina ia faaolaina.

Tumau ile Atua lona lava viiga. Amene.   

Onosai Nofoaiga  [FS]

.………………………………………