FEAU O LE VAIASO!

(Message of the week)

Tusi Faitau Aso: Failauga 7: 1-14 

Matua: Failauga 7: 14 "Ina fiafia ia i le aso e manuia ai, ia mafaufau foi ile aso e malaia ai; ua tuu feagai e le Atua le tasi i le tasi, ina ia le iloa e le tagata se mea e tupu pe a mavae atu o ia."

Manatu Autu: "E oo mai le oti ia i tatou uma." 

                          "Death comes to us all."

E leai se isi e mafai ona sola ese mai le oti. E le alofia foi, po o a lava agaiga o le soifuaga nei, i galuega tatou te faia, o sootaga ma mafutaga tatou te iai, o faamanuiaga ma luitau tatou te feagai, o lona lava taunuuga, o le oti, ma e tatou te le alofia. A o le tuualalo lea a le Failauga, o le manatunatu i le oti, o se mea lelei ma tatau. E le tatau la ona pupuni o tatou loto ma mafaufau i le oti, ae tuliloa manuia ma fiafiaga o le olaga. E tomua manatu a le Failauga i upu nei: “E sili le aso e oti ai nai lo le aso e fanau mai ai… e sili ona alu i le fale o iai le faanoanoa nai lo le fale o fai ai le tausamiga poo le fiafia.” E le o ni upu faavaivai loto, ae peitai o se faamalosiau ina ia aua nei tatou alo mai le tulaga moni o i ai le soifuaga ma lona faagasologa. A ia tatou talia ma le loto maulalo, ma le loto malie. O loo molimau ai foi le Salamo e 90 fuaiupu e 12, “Ia faapea ona aʻoaʻo mai ia i matou e faitauina o matou aso, ina ia maua ai le poto i o matou loto”. A tatou malamalama ma iloa lelei e faitauina o tatou aso, ona tatou malamalama foi lea ona olaina se olaga e amiotonu ma faautauta.

Faimai le fuaiupu e 5 o le tusi sa tatou faitauina nei, “E sili ona lelei o le faalogo i le aʻoaʻiga a le tagata poto, i le faalogo o se tasi i pese a ē valelea.” O le masani o le tagata o le uai o taliga, poo le fiafia i upu e logo malie, e ui ina e le o moni pe talafeagai se feau o aumai ai. A o le tagata poto e faalogo ma tausi i le upu moni, poo aoaiga tuusa’o, e tusa lava pe e tigā. Ona e malamalama le tagata poto, o le aoaiga o loo faavae i le alofa. O nisi foi ua avea le faigata o le soifuaga ma mea ua sisii ai lima ma ua muta le faamoemoe, ma ua amata ona momoo i aso ua mavae, faapea sa sili atu, pei ona molimau le fp 10 “Se a le mea na sili ai ona lelei o ona po anamua i nei ona po? Auā e le o le poto ua e fesili ai i lea mea”. O le lapataiga a le Failauga, ia aua nei tatou tepa i taimi ua tuanai, ma saisaitia o tatou loto i mea ua sola, ma ua le toe maua. A ia tatou fesili po o le a se auala e faaaoga ai le soifua ua aumai e le Atua mo tatou i le taimi nei. Ioe, aua tatou te tumau i mea ua tuana’i, ae ia tatou savavali ma tapenapena mo le taimi nei. Aua nei avea mea o ananafi, ma mea e taofia ai faamanuiaga a le Atua mo a taeao. E i ai mea e le oo i ai se tatou pule po o so tatou malosi. E tele foi mea e le oo i ai le tatou malamalama. E leai se isi e mafai ona filifili le aso e fanau ai, ma le aso e oti ai. Pau a la tatou galuega e fai, o le fuafua, faatino, faatupu ma atia’e, tausi ma tapenapena, a ia faia mea uma ma le loto maulalo i luma o le Atua, aua o loo i ona aao le pule atoatoa, o ia foi e faatonutonuina o tatou aso ma taimi. Faimai le tatou matua, fuaiupu e 14, “Inā fiafia ia i le aso e manuia ai, ia mafaufau foi i le aso e malaia ai, ua tuu feagai e le Atua le tasi i le tasi, ina ia le iloa e le tagata se mea e tupu pe a mavae atu o ia”.  Ioe, tatou te talia na’o mea lelei, ae faafefea mea lē lelei. E pei foi o le fuaitau, e iai aso e lagi lelei ai, e iai foi aso e timuga ai. God allows both good times and bad times to come to everyone. E mamanuina faatasi e le Atua mea lelei ma mea lē lelei, e tofotoina ai i tatou, ia aua nei mafai ona tatou valoia le lumanai, ina ia aua nei o tatou faalagolago i so tatou poto ma so tatou malosi. Ina aua foi nei o tatou manatu, e nao taimi o le sologa lelei tatou te fai ai le viiga. Ae a oo mai taimi faigata, ua tatou tuuaia pe fesiligia le Atua. O lea, ia tatou talia ma le loto faafetai aso o le manuia. Tatou te aoaoina mai foi i aso vale poo aso e malaia ai, ina ia tatou iloa ona ola faalagolago i le Atua, ua tatou mautinoa ma le faatuatua, e leai se mea e tumau o lenei lalolagi, ae maise o o tatou ola.

Le paia e o le tatou ofisa i lenei taeao, o se feau lea o le tala lelei mo i tatou. Ua a’oa’o mai le tusi a le Failauga, e ui ina oo le oti i tagata uma, peitai, e le o le oti le gataaga o mea uma. E ui ina oti le tino, ae ola pea e faavavau i latou ua ia Keriso. Auā o le satauro sa ia faatoilalolina ai le oti ma le tuugamau. Ae ia avea le oti i le lalolagi nei, ma lapataiga mo i tatou, ina ia faasagatonu o tatou amio ma o tatou loto. Aua tatou te fai mea tuu. Aua nei manatu o loo tele pea aso o totoe. Ia vave ona salamo, auauna ma le faamaoni ao maua pea le ola. Ia manatunatu i o tatou aso, ma ia faapotoina ai. 

Tatou tapena i le taimi nei.

-        Ia faaleleia sootaga ma aiga ma uo

-        Ia galulue faatasi

-        Ia ola fiafia e faasoa atu le Talalelei manū o ao, manū o maua le malosi

-        Ia fiafia e tatalo ma mafuta i le Atua i taimi uma

E lē tumau mea o le olaga nei - o tamaoaiga ma tofiga. Auā foi tatou te le o ma tatou i le tuugamau. Ao lo tatou mafutaga vavalalata ma le Atua, e tumau lea e faavavau.

A’o le sili o nei mea uma, ia faatuatua ia Iesu Keriso, o le sa maliu mo a tatou agasala ma toetu manumalo mai le oti, ina ia maua ai e i tatou le ola e faavavau. A tatou faatuatua ia Iesu, e ui ina tatou oti, ae tatou te ola pea.

Ona o Iesu Amene.     

                                                                                                              Jeddah Koria.   

                                                                                                                                                                  ……………………………………….........