Tusi Faitau: Eseta 4: 4-14 

Matua: Eseta 4:14. "Aua afai e te matua faalologo i nei ona po, e tupu mai le tuusaunoaina ma le laveaiina o sa Iuta mai se tasi mea; a o oe, ma le aiga o lou tama e fano outou; e iloa foi e ai e fai oe ma masiofo ona o se aso faapenei?" 

Manatu Autu: "Mo se taimi faapenei." 

                         "For such a time as this."

Fai mai le manatu aoao o lenei masina, "Toatuga ma Toe Fuata'iga".

E i ai taimi e toatuga ai le savaliga a le au kerisiano, o taimi ma ituaso e tofotofoina ai le faatuatua o le tagata, a o taimi foi nei ma ituaso faapenei e femateai ai lagona o le tagata, e lagona le le mautonu ma le atuatuvale, ao itu aso ma taimi faapenei e moomia ai ai le malosi fou e toe fuata'i ai le tagata.

E faapena se ata o lo o aumai i le fetaliaiga lenei a le tama ma le afafine, poo se fetusia'iga mai le tama loto mafatia i lona afafine. O le vaitau o le nofo pologa o le nuu o le Atua ao faatafea ai i Papelonia e oo mai la i le taimi o Eseta, ua faoa e le pule a Metai ma Peresia le tulaga o Papelonia. Lea la e tupu ai le tala lenei, ua logotala Moretekai le tama mataala i le faufauga a Hamanu o le a fasiotia ia sa Iuta uma, o le afuaga lena o le naunau o lenei tagata o Moretekai na fai ma tama o le nuu i lea vaitau e faao'o se feau taua mo Eseta le masiofo a le tupu.

O le vaitau ua to'a ai tiga o le nuu i le Atua, ua moomia se na te faaola le nuu i taimi faapenei ma ituaso faapenei. Ua moomia se tagata na te teo fuata'i le saolotoga o le nuu, ao taimi faapenei e faigata ona sosofa e se tasi tulafono a Metai ma Peresia, aua fai mai le upu o tulafono a Metai ma Peresia e le talaina e se tasi. Ae mo Eseta lava ia ma lona nuu, ua moomia se taimi paganoa e saili ai se saolotoga aua ua oo mai tiga.

E ese le matagofie o upu a Moretekai lea e fai ma matua o le faitauga o lenei aso, afai e te matua faalologo i nei ona po, e tupu mai le tuusaunoaina ma le laveaiina o Isaraelu mai se isi mea, ao oe ma le aiga o lou tama e fano ia. O le upu faalologo o lo o faaaogaina i le matua o lo o faamatalaina i le gagana Eperu e faapea e na'o le faalogo ae le faia. O lona uiga ua tatau ona tulai ma fai loa se galuega laveai.

E iloa foi e ai po ua fai oe ma masiofo ona o aso faapenei? O lea ua faaiu le lagifetaliai o manatu ma i le fesili. E iloa foi e ai, o lona uiga ua silafia lava e Moretekai e mafaia lava e le mana o le Atua na ia filifilia Eseta e fai ma masiofo ona sosofa le tulafono a Metai ma Peresia. E ui i le faigata o le auala ma le fesagaina ma le tulafono, ae ua iloa e Eseta ua tatau ona tulai ma alu ua moomia o ia mo se taimi faapenei.  O le feau atoa lena a le tusi o Eseta, o le taua o lou valaauina i taimi e to'a ai i faigata le savaliga a le nuu.

Le paia e o le tatou mafutaga, e tele taimi ma ituaso e to'a ai i tiga ma faigata le tatou savaliga, ia tatou manatua le fesili lenei po ua avea ea oe ma tagata tautua mo le ekalesia ona o aso faigata, e le gata i lea o tatou aiga, o nuu ma le galuega a le Atua, e tele toatuga e feagai ma i tatou, ae faamoemoe i lou alofa ma lo'u alofa e sosofa ai nei tiga. Faimai Eseta ia Moretekai, tau lava o le anapogi ma tatalo mo ia. E leai se isi auupega malosi o lo o faaaogaina e le EFKS e taimua ai lana malaga, o le tatalo lava aua e manuia ai feau ma galuega. Ia avea oe ma au ma Eseta e toefuataiina le soifua o le tagata ua mafatia ma fia maua se fesoasoani. Po ua iloa ea e ai ua aumai oe ma au e le Atua e auauna ma tautua i le ekalesia?

O le afio mai o Iesu Keriso i le lalolagi, o le tala i le faaolataga ina ua avea le satauro saua ma auala na toe fuataina ai lo tatou ola. O le taimi o le Atua ua afio mai e faaola le tagata ua toatuga le malaga i faiga a le agasala, o lona maliu ma le toetu manumalo mai le oti ma le tuugamau o le taimi taua mo lo tatou ala i le ola e faavavau, tau lava o lou loto faatuatua i le Atua.

Tumau i le Atua le viiga nei e oo i le faavavau. Amene. 

Rev. Faafoi Atonio (FS)  

.............................................