CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: 2 Timoteo 2:14-26

Matua: “20 Ua le na o ipu auro ma ario ua i le fale tele, a o ipu laau ma omea; o isi ua ta’uleleia, a o isi ua ta’uleagaina.””

Manatu Autu: Valaau e auauna i le Atua (Calling to serve God).  

Ua lē o toe po malaē, o le faamoemoe maualuga na valaauina ai Timoteo, Paulo ma le au aposetolo uma, ina ia auauna i le Atua, i le galuega faaaposetolo, faafaifeau tala’i, faamisionare. E o atu e fai nuu uma ma soo, a’oa’o ma papatiso tagata uma i le suafa o le Tama ma le Alo ma le Agaga Paia. O lo latou lea valaauina. O upu apoapoa’i a Paulo mo Timoteo, o loo faamamafa ai le auala e fai ai le galuega lea, ma faatino ai le valaauina lenei. O auala o le faatuatua, faamoemoe, faalagolago i le ta’ita’iga a le Atua a e lē o le poto ma le malamalama o le tagata, auala o le onosa’i lototele ma faamalosi a e le o le faavaivai ma solomuli gofie, ia faamaoni ma tumau ai, a e ‘aua le faitogafiti ma ui i auala pi’opi’o, ia filigā amiotonu ma tautala sa’o, e tusa ma afioga paia a le Atua. Ia faia foi ma le loto maulalo, agamalu ma ia fa’aaloalo, a e le o le faasausili ma mitamita vale. O auala ia e auauna ai i le Atua.

O lona uiga, o le auauna i le Atua, e lē faasino i le ituaiga tofi poo le ituaiga galuega, pe faapea na o le faafaifeau, faamisionare ma faaaposetolo e faasino i ai. E leai. O le auauna i le Atua, o le auauna i auala faaleAtua, e pei ona faamamafa ma a’oa’o atu ai Paulo ia Timoteo. Pe afai e faatino tiute ma faiva i auala e finagalo ai le Atua, ona fiafia mai lea o Ia ia i tatou, ua mālie la tatou tautua i lana silafaga paia “15 Ia e taumafai ia avea oe ma le ua fiafia mai i ai le Atua.” O le auala lea e tutusa ai le galuega faafaifeau, ma le faifaatoaga, failafumanu, le faipisinisi, le matai tausi aiga, le malu o le malo sikulakī ma leoleopō, o le faipule ma le foma’i, faia’oga ma le faaofisa i faletupe ma soo se ituaiga galuega. O valaauina uma e auauna i le Atua.

Mata o le isi lea uiga e faasino i ai ituaiga ipu eseese o i le fale tele – e i ai ipu auro ma ipu ario, a o loo i ai foi ipu laau ma ipu omea. E ui ina eseese faiva, eseese tofi, a e afai e faatino i le alofa, faamaoni, amiotonu ma auala uma faaleatua, ona tutusa uma lea o nei valaauina, o auaunaga uma ua faia e tusa ma le finagalo paia o le Atua, ma ua viia ai o Ia. Peita’i afai e sesē le auala e faatino ai, ona ta’uleagaina lea. Ua a’oa’o mai foi le aposetolo, pe afai e lape le faatatau ma ta’uleagaina, e mafai ona toe faaleleia, e ala i le salamō. “21  O lenei, ai se tasi e faamamā ia te ia ai nei mea ua ta’uleagaina, e fai o ia ma ipu e ta’uleleia, e faasaina, e aogā foi mo le Alii, ua saunia mo galuega lelei uma.”  

Ou te āva ma fa’aaloalo tele, a e manatu e sili atu ona latalata i le Atua le auaunaga a le teufale ma le faitī o le ofisa, e alofa, faamaoni ma usitai i le faatinoga o ona tiute faatauvaa, nai lo le pule ma ofisa sili e amioleaga, lē faamaoni i lana tautoga pe amioletonu i ana faai’uga fai. Pe sili atu foi ona mālie i le Atua le tautua faamaoni a le tamaita’i tiakono ua oti lana tane, nai lo le faifeau po o le a’oa’o e eva i le vaiaso atoa a e lē saunia lelei lana lauga. O le a foi le maualuga o le tofi faipule i le palemene, a e afai e molimau le atunuu i le soli tulafono ma faatupu maseiga, ua lē o se auauna i le Atua, a ua fai ma pologa e tautua le tiapolo. O faapefea mai lou valaauina, lou soifua auauna i le Atua? Viia le Alii, pe afai o fiafia mai o Ia. “20 O lo’u Atalii pele lena, ua ou fiafia lava ia te ia.”  Amene.    .

Faitoaga Tolua (FS) 

.………………………………………