CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Mareko 14:27-31

Matua: f27

“Ona fetalai atu lea o Iesu ia te i latou, “Tou te tausuai uma ona o a’u i lenei po; aua ua tusia, Ou te taia le leoleo mamoe, ona taapeape ai lea o mamoe.”

Autu: E tumau pea lenei lagolago? / Can this allegiance hold?

O le fesili ua aumai mo i tatou e le autu o lenei aso. E tumau pea lenei lagolago? E iai le lagona, e mafai ona fesiligia ai le faitauga o lenei aso, ma maua ai se tali. E talitonu se lagona, e avea foi lea tali ma feau taua mo i tatou uma mo lenei aso.

O le faitauga filifilia o lenei aso, o se tasi o tala ua masani ai le faalogo ma le faitau. O le tala i le tautino o le au soo aemaise Peteru, latou te lagolago ia Iesu seia ia oo i le oti. O se ta’utinoga na faailoa ai le silisiliese o Iesu Keriso, ina ua ia faailoa manino ia Peteru le mea e tupu i le lumanai. O le saunoaga a Iesu ia Peteru, “E moni, ou te faiatu ia te oe, O lenei aso, o le po nei lava, a o lei oo i le vivini faalua o moa, e te faafiti faatolu mai ia te au.” Ua tatou iloa le taunuuga, e lei tumau le lagolago a le au soo ma Peteru ia Iesu, ae na faafiti lava. O le leo o le pisapisa-o o le lalolagi ma le tiga o le oti ua ataata mai, na liu suavai ai le loto lagolago ma le talitonu. O le lagona ua aluese mai le loto talitonu. Ua liua i le le mautonu ona ua le o gatasi le vaai o mata ma le faamoemoe faa-le-tagata. O le au soo sa manatu e tumau le mafutaga ma Iesu, ua fulitua ese i le lagolago, ae pulea e le fefe ma le mata’u i le tagata.

E manatu, ua le o toe iai nei lu’itau mo tatou ma lenei vaitau ua tatou iai. Ua uma ona faia e Iesu o mea uma, ma ua molimau lona soifua paia ia te i tatou i mea uma e ao ona fai. Peitai, ua tatou iai i le lalolagi ua ala eseese mai faigata ma le tele o le taufaasese i le finagalo paia o le Atua. Ua le iloga lea mau lotu ma lea mau talaiga. Ua matua taumafai le poto o le tagata e faailoa lona matautia. Ua oo lava foi ina vatau ai nisi malo ma atunuu i le manatu o loo ia tei latou le sa’o o mea uma. Ua tatou molimauina lava i o tatou lava lau fanua i Samoa nei le tele o nei suiga, aemaise le tau faamatalaina o le malo o le Atua. E talitonu le manatu, ua fesiligia ai lava le toatele o tatou uma i le fesili ua fai ma autu o le asō, “E tumau pea lenei lagolago?”

Ioe, o le toatele o tagata lotu i lenei vaitau, ua filifili i le lotu e fifilemu ma maua ai le tupe ma le oa o le lalolagi nei. O nisi ua manatu e sili le nofonofo ma lotu i lona fale e sao ai le agaga. O le toatele ua mulimuli i lagona faa-le-tagata ma ta’i ina i le mea ua mafuli iai le toatele. O mau lu’itau ia ua fesiligia ai pe tumau pea lo tatou lagolago i alafua ua uma lava ona faailoa mai e Iesu e ola ai. O le Talalelei faimai le matou Faifeau, “E pei o le tui a le fomai, e tiga, ae manuia ai le ma’i.” E le faigofie le Talalelei, o le tala moni lea.

O Iesu Keriso lava na faia mea uma ma faailoa mai le ola e tatau mo tagata uma e lagolago i lona malo. O le alofa i le Atua ma alofa i lou tuaoi. E faigata ma tiga ala uma na ia ui ai. Na oo lava i le sataro mataga ma le oti, peitai o le aso tolu na toetu manumalo mai ai o ia e tusa o le finagalo alofa o le Atua le Tama, ina ia ola tagata uma i le mafutaga ma ia faavavau. O le ola sili lea mo tagata uma, e tumau ma mauaa le lagolago i lona finagalo e le aunoa.

Ia tumau i le Atua lona lava viiga, nei seia oo i le faavavau, faavavau lava, Amene.

Kereveta Tiumalu (FS) 

.………………………………………