CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Luka 20: 9 -26

Matua: Luka 20: 13-16a

“Ona fai ane ai lea o le alii e ona le tovine, se a le mea ou te faia? Ou te auina atu lo’u atalii pele; atonu latou te ava mai ia te ia. A ua iloa atu o ia e tagata galulue i vine, ona latou fetautalaai ai lea, ua faapea ane, o le suli lena; ina tatou fasioti ia te ia, e maua ai le fanua mo i tatou. Ua latou tuli ia te ia i tua o le tovine, ma latou fasiotia. Se a foi le mea e faia ia tei latou e le alii e ona le tovine? E alu atu ia ma faauma tagata galulue i vine, e tuu atu foi le tovine i nisi tagata”.

Manatu autu: O le faataoto i ē galulue vine (Parable of the tenants).

O upu masani ai, ‘e afua mai mauga le manuia o le nuu; e ā uluga e tafega ae selefutia ai vaisigano’.

O loo agai le faataoto lenei a Iesu i tagata na auina atu e le matai e galulue i lana tovine. E 4 vaega tāua o le faataoto, (i). O le tovine (Isaraelu), (ii). o ē galulue vine (taitai), (iii). o lē ana/pule i le tovine (Atua), (iv). o le atalii (Iesu).  

E manino le feau – o taitai o Isaraelu na filifilia e le Atua e galulue i lana tovine o lona nuu lea o Isaraelu, ae ua latou fa’aaoga ma faapologa le nuu o le Atua mo lo latou lava lelei na o i latou lava. 

I le faataoto,  ua o’o i le taimi o le fuata – ona  auina lea e lē ana le tovine o lana auauna e aumai ni fua peitai ua sasaina o ia e le ‘au galulue vine ma aufuaina mai o ia; ua toe auina atu e le matai e ana le tovine le isi ana auauna, ua latou sasa ma agaleaga ia te ia, ona latou aufuaina mai ai lea o ia; ua toe auina atu e le matai le lona 3, ua latou fasia o ia ua manu’a ma latou tuliesea; lea ua manatu le matai e auina atu lona atalii ae ua latou iloa le atalii o le matai ma latou tuli i tua o le tovine ma fasiotia ai o ia.

Ua faai’uina le faataoto i le afio mai o lē ana le tovine e fai le i’uga (justice) ma tofia nisi tagata e sui i ē galulue vine. O le a se tala a le faataoto mo Samoa ma le ekalesia i le nei vaitau? O le fesili - o tatou taitai o tatou tagata i le Atua e ana le tovine ma atia’e lona malo poo faapei lava tatou o taitai o Isaraelu anamua o ta’ua e le faataoto a Iesu?

Faasino o tatou tagata i le Atua e ana le tovine; o le fai ma taitai lelei e fai e le Atua, pei o la le faisalamo 75, “a o le Atua na te faamasinoina, o ia na te faamaulaloina le tasi, o ia foi na te faaeaina i luga le tasi”. Lea foi na a’oa’o ai Iesu i le tala a Ioane 15, “Ua le filifilia a’u e outou, a ua filifilia outou e a’u; ua ou tuuina atu foi outou, ia outou ō ma ia outou fua mai ni fua, ma ia tumau ō outou fua..”.

Tatou tatalo i le Alii ina ia taitaiina e lona mana o tatou taitai i aiga, nuu, malo faapea le ekalesia, ina ia tatou taitai tonu ma le loto maulalo ona tagata poo lana tovine, ia iloa atili ai i la ta taitaiga le Atua e ana le tovine, ma tatou tali atu ai i manaoga o nai o tatou tagata o mativa ma lē tagolima; leaga mea o nonofo ai; ma lē lava le faasoa e tali ai manaoga o aso uma faapei o le tausiga o fanau, o a latou meaai ma latou aoga faapea se lumanai manuia o aiga uma o Samoa.

E le gata i lea, ae ia toe faaolaola mai le afiafi i aiga ua mou atu, ua tau le faalogoina le pepese o ni afiafi i aiga; ua le toe iai se taimi o le Atua i le afiafi ma le taeao i loto ma mafaufau o tagata; e le gata i lea, sei tautuana le Aso Sa Samoa, ua tatala mai lava faleoloa o Saina mai le taeao e oo i le afiafi po ua pei le Aso Sa o se aso aunoa; ua faamanatu mai le faataoto a Iesu – vaai i le Atua ma vaai ane i lana tovine na tofia oe e taitai i ona ala ma ia fua ni fua lelei i ola o tatou tagata.

O le nei vaitau – tele le mau soligatulafono, lona uiga e lautele la ta galue faaleleia e fai i le tovine a le Atua – e le gata i le tino a’o le mafaufau faapea foi i le agaga. 

Manaomia ni e galulue vine faamaoni e fai ma aao faaola o le Atua i lana tovine -  lo tatou atunuu ua faavae i lona suafa paia le Atua le Tama, le Atua le Alo ma le Atua le Agaga Paia.

Tumau i le Atua e ana le tovine  le viiga nei e oo i le faavavau, ona o Iesu – amene!

                                                                                                                     Anzac Tuala FS (Ofisa Failautusi Aoao) 

                                                                                                                                                                             ………………………………………