CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Isaia 52: 7 – 10

Manatu Autu: Filemu ma le Faaolataga (Peace and salvation)

E tuufaafeagai le tulaga mālū o le filemu, ma le loulouā o le vevesi; e eseese mamao le matagaofie o le faaolataga ma le tiga o sauaga. E lē faatusalia le faanoanoa o le Tafeaga, ma le olioli o le Toe A’e/Toe Foi o le Tafeaga mulimuli ane e pei ona faalauiloa e le perofeta o Isaia. “E matuā matagofie i luga o mauga o vae o le ua fai mai le tala lelei, o lē logologo mai le manuia, ua tala mai le tala lelei; ua faailoa mai le olataga; ua fai mai ia Siona, O loo pule lou Atua.” Mo Isaraelu i le tafeaga, ua lava ma totoe upu faalototele, faafiafia loto ma faamafanafana o loo alaga atu ai Isaia, e fai ma vai mālū e mapu ai lo latou tiga ao feagai ma puapuaga o le tafeaga. E le gata o le faalogo atu i ai, a ua mautinoa i lo latou faatuatua, e moni lava ma e taunuu lava i aso ma taimi ua finagalo ai le Atua. O le filemu ma le faaolataga o mea patino i le Atua na pule, na te amatamea, na te faatino ma faataunuu. E leai foi se tagata poo se malo, i sona ma’ema’e ma sona malosi, na te tofotofo e toloa pe faalēaogaina lea manuia mai le Atua.

O loo o’u i ai nei i se tulaga o tiga ona o le mataupu tau le penisione - ua teena la’u talosaga ma le faamoemoe e malolo faa-penisione i lenei tausaga, ua aulia ai lo’u 70. Sa talosaga i luga o le faasinoga a le Faavae (i ona upu ma mata’itusi faaSamoa ma le faaPapalagi) ou te agavaa ai; peita’i ua lē o gatasi le futia ma le umele, ina ua ese le faatofalaiga a le Komiti a Tama o le Ekalesia, e tusa ma lana faauigaina o le Faavae. O se tiga e matuitui, ina ua lē amanaia se tautua faatauvaa mo le 37 tausaga; ua lē aloaia se auaunaga sa faia - sa tausi nuu mo le 12 tausaga, ma galue pea faalausoso’o i le tele o nisi o tofiga, e oo mai i le taimi ua atoa tausaga faasino mai e le Faavae, a e paga lea, ua lē taulia. Tuu ia le tulaga tau faamanuiaga i tupe, o se mea faatauvaa; a o le itu e sili ona tiga, o le lē amanaia i sauniga aloaia, o se galuega sa fai mo le Ekalesia. E faaopoopo i lena, le oona o le tau solomua i le tamā o le Matagaluega, ona ia toe faasolomuli ese mai le mataupu, e pei ona faamauina ai i le faai’uga.

Ui i lea, ua ou talia lena faai’uga ma le loto maulalo; ua ou faamagalo foi. A e fia faailoa pea, e tusa ma le feau o lenei aso. Ou te lagona pea le filemu ma le mafanafana, i le faatuatua o loo silafia e le Atua e ana le galuega, le amiotonu pe leai foi o faai’uga ua fai. O Ia e pule, o Ia foi e faia le taui o lana aufaigaluega. Ou te talitonu i lona alofa, ma lana faamasinoga tonu, na te faia le mea e sili mo i tatou taitoatasi, i lona lava taimi, i ana lava auala. O le faatuatuaga lea ua maua ai le filemu ma le faaolataga, a o i ai i taimi faalaulau toafa o mea e tutupu. E faapena foi a o siosiomia i tatou i manu’anu’a ma gasegase faaupufai o malo i lenei vaitau; e lagona lava le filemu ma le mafanafana, auā e lē valea le Atua, e sili ona atamai o Ia, e faamasino ma le tonu, e faamaoni ma alofa, i e matata’u ia te Ia. Ia totofi mai e Ia ni ta’ita’i faalemalo, e faia lona finagalo, ma maua ai e tagatanuu o Samoa le filemu ma se faaolataga i aso uma o le soifuaga.  Amene.   

Rev Faitoaga Tolua  

.………………………………………