CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Matua: Roma 5: 1 – 5

Manatu Autu: Tumau i le onosa’i (perseverance).

O nisi ia o ituaiga mataupu silisili e lauiloa ai le Tusi lenei ia Roma, e taumasuasua le tamaoaiga faaleagaga, e loloto lautele mamao maualuga, le auauina pe tautalatala nisi uiga o lona autu, ‘ta’uamiotonuina i le faatuatua’. E i ai le fesoota’iga o laasaga eseese o le soifuaga faatuatua, ma le faavae e ala ai ona mitamita le kerisiano faatuatua. O la le aposetolo, ua tatou mitamita i puapuaga, auā o puapuaga e tupu ai le onosa’i, o le onosai e tupu ai le mautinoa, o le mautinoa e tupu ai le faamoemoe; o le faamoemoe foi e lē ma ai, auā ua faamaligi mai le alofa o le Atua i o tatou loto, e le Agaga Paia ua foaiina mai ia te i tatou.

E tautala mai Paulo i le soifuaga faasoo ua masani ai (teaches from experience), talu ona avea ma ipu a Keriso e tauasu ai le Tala Lelei. E le’i avea lona liliu ia Keriso na ‘alofia ai puapuaga, a e na pei e tosina atu ai le tele o sauaga ma tiga ia te ia, e tusa ma le tala faasolo o lona fai ma faifeau a Keriso. A o ia puapuaga uma, na a’oa’oina ma saga faateleina ai lona onosa’i – le malosi e oono ai pea ma inu i mea leaga o fai mai e tagata, ona o le tulimata’i o le faamoemoe o lona valaauina, e manumanu ne’i toilalo le misiona a Keriso. E onosa’i foi ona o le manatu alofa i lona Alii o Iesu sa tigaina mo ia, sa na tali atu le leaga i le lelei, aemaise lona onosa’i e tauamo le mamafa o le satauro.

Fai mai le susuga a Oka Fauolo FT, afai e te faalogo atu ua tauau ina uma lou onosa’i, ona toe onosa’i tasi lea. I lenei vaitau o faiga taulaga, ia tatou faamalolosi e fai taulaga e lelei ma tele; o le manaia o le fai taulaga, o le faalogoina o le tigaina, o le tiga o le faamativaina ina ua ave uma, e oo i le totogi ua ave uma. E lagona le fiafia loloto ua mafai ona fai se mea lelei mo Keriso. ‘Aua le faavaivaia oe i upu ma lagona faavaivailoto, o faaosoosoga, a ia tumau le onosa’i auā e i’u lelei, e faapaleina i le manumalo, auā e faatasi mai o Ia. “9 O lo’u nei alofa tunoa e lava lea e fesoasoani ia te oe; auā o le vaivai e fa’aatoaina ai lo’u mana.” 2 Kori 12.

                                                                                                                    Faitoaga Tolua (FS)

                                                                                                                                                                       ………………………………………