CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Filipi 4: 2 – 23  

“Ia outou olioli i le Alii e le aunoa; ou te toe fai atu, ia outou olioli. Ia iloa lo outou agamalu e tagata uma lava, ua lata mai le Alii. Aua ne’i popole outou i se mea e tasi, a ia faailoa atu o outou manao i mea uma lava ile Atua, i le tatalo, ma le faataoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufaui ia Keriso Iesu.” (fuaiupu 4–7)

Manatu Autu: Vaipuna o le olioli/ spring of joy

O le fesili; O le a le mea o le Vaipuna o le olioli? O le a lona uiga? A o fea e maua ai?

O lea ua faa’iu le tusi a le Aposetolo o Paulo mo le au uso faatuatua i le Ekalesia i Filipi. Le aulotu e pele ile Aposetolo. O lana uo mamae. Lea ua ma’ea le tusi, ua oo mai i le taimi o upu taumavae e pei ona masani ai Paulo i le tele o ana tusi i isi foi Ekalesia Kerisiano i nuu ese.

O le masani a Paulo i ana tusiga, a o le’i faia le upu faamanuia ma upu faaiu, e muamua lava ona ia toe taa’ofa’i le faamoemoe o lana tusi i se manatu e tasi, e ‘auau ai o ona manatu ma ana upu faamalosiau ua tuuina atu i lea aulotu ma lea aulotu. E faapei foi la o le Ekalesia lenei i Filipi. Lea ua ‘auau manatu o le Aposetolo i lona matuā faamalosi i le au faatuatua uma i Filipi; “ia maua le olioli i le Alii, e oo lava i le lotolotoi o luitau o le olaga.”

O le Vaipuna o le olioli lea i le manatu o le Aposetolo. Fai mai e lē o se ituaiga olioli mo sina taimi, po o se olioli e faaosofia ona o se tala mālie po o se fati  matagofie ma ola  ile faalogo, leai. Fai mai o le ituaiga olioli o se fiafiaga loloto ona o le mausalī o le faatuatua i le agalelei o le Atua ma le alofa o Keriso. Le olioli e faasino i le mafutaga ma Iesu Keriso o le vaipuna o le olioli – o le loto faamalieina ma le lava mautinoa. O le ituaiga olioli lava lea e faatatau i le mauaina o le olioli i la tatou sootaga ma le Atua.

Le uiga lea o le matua. Fai mai Paulo;

“Ia outou olioli i le Alii e le aunoa; ou te toe fai atu, ia outou olioli. Ia iloa lo outou agamalu e tagata uma lava, ua lata mai le Alii. Aua ne’i popole outou i se mea e tasi, a ia faailoa atu o outou manao i mea uma lava ile Atua, i le tatalo, ma le faataoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.”

Lea ua uma ona faufautua Paulo e uiga i faafitauli e patino i le Ekalesia i Filipi. O le faamalosi ia lotogatasi le aufaigaluega, ia lotogatasi le ekalesia ma la tatou molimau i le lalolagi. E faapei ona i ai Evotia ma Sunetui, o i latou o ni tagata faigaluega.  Sa alofa Paulo i ai latou, auā o i latou o ni Kerisiano faamaoni.

 Ua  ma’ea foi ia ona faailoa e Paulo lona manatua pea o meaalofa a le au uso Kerisiano i Filipi mo ia. O lona agaga fiafia ma le loto faafetai i mea uma aemaise o le a’ao māfola ma le lima foai e ala i tupe sa fesoasoani ai mo ia. Ma o le faailoga o latou faamaoni i latou tautinoga aemaise o le loto alofa tula’i ma le agalelei.

Ua aoaoina le Ekalesia i Filipi e le Aposetolo, e uiga i le Atua  o le  faamalieina ai manaoga uma e tusa ma le oa ia Keriso Iesu. Aemaise ai ole Filemu mai le Atua e leoleoina ai o latou loto, loto popole. O le faamoemoe ia taula’i atu o latou mafaufau ile olaga ma uiga lelei uma, auā o le mea mautinoa o lo o faatasi mai le Atua o le Filemu ma latou. E tusa lava foi pe a oo ina lutaluta le tai ma oo i le lotolotoi o luitau o le olaga, fai mai Paulo, e mafaia mea uma ia Keriso, o lē e faamalosiau.  O lona uiga, o le ola faalagolago i le malosi o Keriso, e ala mai ia te Ia, le mafai e mafai ai ona latou feagai ma soo se luitau o le olaga ma le olioli ma le mautinoa. O lea, ia olioli i le Alii, ma ia faamasani i le olaga tatalo. O nei mea uma, afai latou te faatinoina, o le a tatou iloa ai ua sili atu ona faamalosia latou, ia olioli ile Alii, ma fua mai i le olaga Kerisiano.

O upu masani ai le atunuu, o a mea ua faia ua lelei, ave lea i uta e fai ma viiga o le Atua. Faapea upu faaiu a le Aposetolo o Paulo, faauma lava i le vivii atu ile Atua ona o tagata talitonu i Filipi. O le faamoemoe ina ia faia pea ma viiga o le Atua, le soifua ma le ola talitonu ma auauna o le aulotu i Filipi. Ma ia aua lava nei galo,  o loo faatasi mai pea le  alofa tunoa o le Alii o Iesu Keriso ma i latou. Le Keriso o le Vaipuna o le olioli. Le olioli loloto ona o le mausalī o le faatuatua i le agalelei o le Atua ma lona alofa tunoa. Le olioli e maua ia Keriso. E maua ile Atua.

O le feau foi lea o le Talalelei mo tatou. O loo tatou iai se lalolagi o le taufaie’li o le tagata lava ia e tau saili le olioli moni. E faapei o latou o loo galulue e eli e tau saili le auro. O le ola aoaoina ile poto ma le atamai. O galuega i tofi ma valaauina. O le oa ma le tamaoaiga. E faapea foi i le Ekalesia, i le soifua galulue o le au Kerisiano. O le malaga faalefaatuatua. Lea ua faamanatu mai le Talalelei, o Keriso, o le Vaipuna o le olioli. Le olioli moni o loo tau saili ma taufaieli e le tagata i lea aso ma lea aso. E faapea foi le au uso Kerisiano faatuatua uma ile lalolagi. E faatoā e maua lava le olioli moni ile Alii. E maua ile ATUA, ae lē maua i se isi lava mea. Tele faafitauli ua tutupu mai, ma alia’e i nei aso, i Aiga, nuu, le Malo, faapea foi le Ekalesia. Pe le o isi lea mafuaga, ona ua sesē le mea ua saili i ai le olioli moni?

O le olioli moni, e maua ile faalagolago ma le faamoemoe pea ile Atua. E maua i lo tatou o faalologo ma usiusitai, onosa’ia faigatā ma puapuagā, ma faia pea lona finagalo. E maua ina ua tatou faamasani ona faailoa atu lona aao faaola ma lona finagalo alofa ile lalolagi. E maua ina ua tatou auauna ile Atua ile faatuatua ma le salamo faamaoni. Maua ina ua alofa i le Atua, ma alofa i lou uso vaivai.

Amene! 

Niutuiatua Onesemo (FS) 

.………………………………………