CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Matua: 1 Samuelu 28: 16-19

Manatu autu: O le taulaitu fafine o Enetoro (The witch of Endor).

O le mataupu iloga o lenei vaiaso e faapea - o iloa ea e tagata Samoa o i ai se perofeta i le nuu, pe tau ina ta’u ae o se mea ua le toe tāua?  E faatali ea i le perofeta le lotu ma le osiga o taulaga, pe fai loa e oe le tupu poo le taitai’au le lotu ma osi le taulaga faapei o Saulo? O fea tonu e malosi o aupega o le taua poo le Alii le Atua? O toe maua ea le alofa moni na iloa i le mafutaga a Ionatana ma Tavita io tatou taitai ma tagatanuu o nei aso – pe o le mea masani lava – e uō uō ā foa. Fai e Iesu tatou ma ana uō pe ‘a tatou fealofani ma alofa le tasi i le tasi; le alofa lea faa-Ionatana ma faa-Tavita. Tāua tofiga o le fai ma taitai o le fai ma tupu mo le manuia o tagata uma ae le mo na o se lelei mo na o se tupu ma lona aiga ma nai tagata to’aitiiti.

Fia maua e Saulo se faamaoniga pe manumalo i le taua ma Filisitia pe faiaina auā ua tuumalo le ositaulaga o Samuelu. Mo le tagata e maua le tofiga ona o le Atua ae faagalo ma lē usitai i le Atua; lea ua fememea’i ma fia maua se tali – ona saili lea i le taulaitu fafine o Enetoro, ae fa’aali mai e le taulaitu Samuelu ua tuumalo/oti. Ua faasoesa le nei tupu o Saulo i le ositaulaga ua alu lana malaga – ia ma ua fa’aali uma iai e Samuelu mea uma o le a oo ia te ia; e vave tele le taimi o le tagata e fai ma fili o le Alii – fai mai – o taeao a ena  – e tuuina atu ai oe ma ou atalii i lima o Filisitia ma fasiotia ai.

O le a se feau mo Samoa i le nei vaiaso – o le faatautoina o tatou taitai faa-le-malo? E manatu nisi – e iai le avanoa o loo fia faatumu i soo se tagata ola. Mo Saulo – na iai Samuelu ae ua tuai ona ia tago lea ma osi le taulaga; ua fai foi e Saulo aupega o taua ae ua le faamoemoe i le Alii e tau mo Isaraelu; ua le toe maua le alofa moni i le loto o Saulo; sa fai e le Alii Saulo ma tupu ae ua fouvale ma tete’e i le Alii ma fai ai o ia ma fili o Alii; ua saili Saulo i le taulaitu mo se tali ina ua maliu Samuelu, ae o le tali lava e tasi – o le a lafoaiina o ia ma lona aiga uma e le Atua. O le avanoa o loo ia te oe ma a’u foi – o le avanoa o le Alii Faaola ma lona alofa tunoa; e te faatumu loa i se isi mea, ona fai loa lea o oe ma fili o le Alii.

O nei aso ua amata ona le toe iai se avanoa o le Atua i loto o tatou tagata i le tele o taimi i le afiafi ma le taeao, i le ola auauna ma le tautua; ua oo i le alofa sa fusia ai aiga potopoto ua amata ona mou ese atu; ua pei le Alii na o se mea e tau ina ta’u ma faafoliga le ta’uta’u o lona suafa ae ua matuā mamao lava ma lē iloatino lona finagalo paia i mea ma faaiuga tatou te fai.

O le feau o le Talalelei - ia moni le fai o Iesu ma Alii ma Faaola e taitai ma tapasa ma faatonutonu folau i o tatou valaauina ma tofiga ‘aua lava le faatuai, auā e le pine lava e le faatuai le faamasinoga ma le oo mai o le to’asa o le Alii i ē fouvale ia te ia ma lona finagalo paia.

Tumau pea i le Atua lona lava viiga nei seia oo i le faavavau – ona o Iesu amene!

                                                                                                                    Anzac Tuala (Ofisa Failautusi Aoao)

                                                                                                                                                                       ………………………………………