FEAU O LE VAIASO!

(Message of the week)

Tusi Faitau: Filipi 4:1-7

Matua: f.1, “O lenei, o‘u uso e, o e ou te alofa ma naunau i ai, o lo‘u fiafia ma lo‘u pale, le au pele, ia faapea ona tumau o outou i le Alii.”

Manatu Autu: Atia’e faatasi ina ia mafuta faatasi

                                    (Build each other up into unity)

O le mafuta faatasi, i le loto e tasi, i se nofoaga e tasi, gagana e tasi, aemaise e tasi le faatuatuaga, o le faailoga lea o se faapotopotoga o loo maopoopo lelei, e nonofo fealofani tagata uma, e femalamalama’i le tasi i le isi, lelei le va fealoa’i, le va fesoota’i, le va tapuia. E lelei ona taitai ma ana pulega, e matata’u i le Atua, alolofa i tagata, amiotonu i faaiuga fai. O molimau ia, o loo mafuta lotolotoi ai ma le Alii.

Peita’i o ituaiga mafutaga maopoopo nei, e vave lava ona osofa’i e le fili ma ana ‘au, ina ia lepeti le filemu ma le nofo lelei, a ia tupu fevaevaea’iga, ma malepelepe ai le mafutaga. Ma o taimi faapea, e manaomia ai nisi e faia le galuega faalelei, ina ia vave toe faafoisia le lelei o le mafutaga. E valaauina ai i latou o tupu tonu ai le faafitauli, ina ia tausolomua i latou ona fofō alamea, faapea ma nisi o latalata ane i ai, e fesoasoani, e fai ma pae e auli le maanuminumi, e fai ma filo e fonofono masae, o ma’a e toe ati a’e ai le pa ua solo.

E faapenei le manu’a o le Ekalesia i Filipi, na logo i tino mamao mai e Paulo lona tiga, a o noanoatia i le toese. E le’i māmā i le aposetolo, le aulotu e le’i leva ona faatuina, a o lea ua amata ona toe maluelue lona maopoopo. Le Ekalesia sa fai mona mitamitaga, e pei o ana upu, o lana pele, o lona pale, o alofa ma naunau i ai; o lana uluai aulotu faatu i Europa, le nuu na vave ona talia le Tala Lelei, vave ona tupu,  malolosi i le faatuatua, o le ola fai taulaga, sa le’i i ai se Ekalesia i lea itulagi, e lata ia Filipi, i le meaalofa na sasao.

Ae pei ona vave lona tupu lausiusi faaleagaga, sa vave foi ona osofa’i e le fili, na ui ane i nisi o le ekalesia, o fafine o Evotia ma Sunetui, ina ia malepe ma mate ifo le Tala Lelei. Ua le o ta’ua le pogai o le feseeseaiga, ae o le ta’ua faapitoa o nei suafa, e iloa ai o nisi o ta’ita’i iloga o le ekalesia. Ae tele mafuaaga eseese, o vaivaiga ma faafitauli masani, e va ai le fogavaa, e fefulituaa’i ai. E pei ona tatou vaaia foi i lo tatou lotoifale i nei ona po, i nuu ma le ekalesia, aemaise i faigamalo a lo tatou atunuu.

E le taumateina sa aafia ai le tausinioga mo le umia o le pule, ma le paoa, i totonu o le Ekalesia. O i la’ua nei o nisi o ulua’i kerisiano, mata sa fa’aaoga foi o la’ua maota e fai ai lotu. A o le tasi lea mafuaaga taatele o misa ma fevaevaeaiga, o le fesili poo ai Muamai a o ai Mulimai. O ai e sili tofi, o ai e mamalu suafa, e maualuga tulaga, o ai e tele mea, o ai e fai faailoga, ma isi faatusatusaga.

Atonu foi o aafiaga o tulafono ma faiga faavae, ina ua tofu le tagata ma lana faauigaina, e tusa ma lona mana’o, e tofu ma vaega e ave i ai le faamuamua; ma i’u ai ina fai vaega, e pei ona sa tupu foi i Korinito. Pe ona ua malosi le faamasinosino, le tautuua’i, tau le pua ma lafo, ma isi amioga faatupu fevaevaeaiga, o tatou molimauina i nei aso.

O ituaiga amioga faapea, ua va ai le fogavaa, ma e ui ina nonofo faatasi, e pipii tia, ae mamao ala; o se mafutaga foliga faafaresaio, e ‘ata’ata mai fafo, a o totonu o loo inoino mai. O le valaau a le aposetolo i lana pele o Filipi, ia tumau le fealofani, le maopoopo, le gatasitasi; ia ati a’e le mafuta faatasi o le tino o Keriso. Ua faai’u ai lana tusi i lana faaolooloma’au, ina ia soa le pule, ia mulumulu’aufoe, e ati a’e faatasi, ina ia mafuta faatasi. E lasi auala, a o nisi nei e pei ona folasia i le anotusi:

i)Ia latou maua le manatu, le mafaufau, le loto sa ia Keriso Iesu; le loto maulalo, e faavae i le alofa; le faamaulalo e faamuamua ai le isi tagata, ia amanaia  ona manatu, faataua sona finagalo – ‘aua le faatauagavale ma manatu faatauvaa i ai, o se pola e motu i tua, a ia avea o se tofa e mamao ma se utaga loloto.

Fai mai le fautuaga faaofisa o fela’uaiga (LTA): Aua e te tausisi i lou sa’o, ae faamuamua lou saogalemu. E fetaui foi i le itu faaleagaga, i auala e tumau ai le mafuta faatasi o le ekalesia. Ina ia ‘aua le tausisi poo ai e sa’o, auā na o le Atua e tonu, na o Ia foi e silafia le tagata e sa’o. Aua le mana’o i le i’a, a ia manumanu i le upega. Tuu pea i le Atua na te faia le faamasinoga tonu, e fa’aalia lava i lona taimi le mea moni. A ia alu ifo le tagata i lalo, e maua ai malo; o iina e maua ai leleiga, tumau ai le gatasitasi o le ekalesia.

ii)Ia sili ona pele le mafutaga ia Keriso, nai lo sootaga faaletagata. Tasi lea pogai o fevaevaeaiga i totonu o le ekalesia, le aiga o le au faatuatua ia Keriso; ona o le tausisi, faamuamua o piitaga faalelalolagi, sootaga o ivi, toto ma aano. E ala ai ona tainane ina lē fetaui faanifo o se mataupu (tulou), e pei o lea upu, ae taumafai lava nisi e fai i le maso, uuna’i faamalosi ia manumalo, ona o sē tau i ai; ma faapi’o ai le faamasinoga amiotonu.

E fa’aaoga soo le upu faaSiamani e pasese ai - “E mafiafia atu le toto nai le vai.” Ae i ai le isi teuteuga e sili atu lona faaliliuga: “E mafiafia atu le toto o le feagaiga, nai lo le vai o le fanau mai.” (the blood of the covenant is thicker than the water of birth). Mo tagata o le ekalesia, e sili atu ona loloto sootaga o le feagaiga ua osia i le toto o Keriso, ina ua toe fanaufouina, nai lo piitaga faaletino, faalelalolagi. A faapena itutino uma o le ekalesia, o le a vave ma faigofie ona atia’e le mafuta faatasi.

iii) Ia olioli i le Alii e le aunoa, ma ia saga faafetai. A loloto le olioli, e lē maluelue le mafuta ma Keriso, mafuta ma le isi uso. Le olioli e lē popole ai i se mea e tasi; le olioli e le faavaea i mea faaletino e maua – le ‘oa ma tamaoaiga e pala; ae o le olioli ua faamalieina i le alofa o Keriso, lana faaolataga ma lana faamanuia o aso taitasi. Tainane ina mativa, o sauaina, e lē amanaia, ae olioli pea ma fiafia, faafetai ma vivii ia Keriso, o Ia e amiotonu, o ia te Ia le taui ma sui. O le olioli e le toe i ai se faameo, se toatama’i, a o le faamagalo atu, fai faaleleiga ma faatumauina ai le tasi ia Keriso.

Le au uso pele ona o Iesu Keriso, o le Tusi ia Filipi, o le valaau foi lea a Keriso ia i tatou, o ona uso, o ana uo pele, o lona palealii o naunau i ai; ua valaauina i tatou e fai ma ana auauna, e ati a’e le mafuta faatasi o lana ekalesia. O le faavae o le EFKS faasino i le va feagai o ana komiti, E le feāiāa’i, a e galulue faatasi, mo le manuia o le ekalesia.

E le a’oa’ia e le matapia le manaia, a o tiute faaMasefau e taulogologo. E faapena foi tatou le aufaigaluega i le ofisa tutotonu, i o tatou tiute ma faiva, ua tofu le tagata ma ona nafa ua fitoitonu ai; ae galulue faatasi, fai ma le faamaoni, mo le manuia lautele o le ekalesia. E i ai taimi e luluina ai le Ioane Viliamu, ae ia tatou faatuatua ma loto tetele, o soifua le Alii; lafoa’i ia te Ia e pule ma faasino mai, tatou ati a’e faatasi ma Ia, ae ‘aua le faamoemoe i so tatou atamai. Auā afai e le atiina a’e e le Alii le fale, e a’e fua o tatou faiva.

O Keriso ua na faatomua le faia o lo tatou leleiga ma le Atua, e ala i lona maliu ma le toetu manumalo, ua faamagalo a tatou agasala, ma tatou toe maua ai le avanoa e mafuta faatasi ma Ia. Pe afai tatou te salamo faamaoni, ma faatuatua i lona suafa paia. Manuia lau faatamasoaliiga o lenei vaiaso. Ma ia ia te Ia le viiga e faavavau. Amene.

                                                                                                                 Faitoaga Tolua (FS)  

                                                                                                                                                                  ………………………………………