FEAU O LE VAIASO!

(Message of the week)

Tusi Faitau Aso: Ieremia 32:6-15 

Matua: Ieremia 32:9-10 “Ona ou faatauina lea mai ia Hanameali, le atalii o le uso o lo'u tama, o le fanua o loo i Anatota, ma ou fuatia ia te ia o tupe, o sekeli ario e sefulu ma le fitu. Ona ou tusia lea i le tusi, ma ou faamaufaailogaina ai, ma ou amia mai molimau, ma ou fuatia le ario i le fua faatautau.”

Manatu Autu: "O se faatauga ua faamaufaailogaina"

                          "Symbolic transaction"

 Faamaufaailofaina: E le gata ua faatau, ae ua faamaufaailogaina i poloaiga ma tulafono e avea ma meatotino moni a le ua ave iai, ma e le toe aiaina e le sa umia muamua lea meatotino e pei o le fanua. E iai le talitonuga o le faatinoga o lo o fai ai le faatauga o fanua ua tatou masani ai, o se faasino ala na faataatia mai le tusi paia, pe a vaai i le faasinoga o lo o faamatala mai e le tusi faitau o lenei taeao.

O lo o faamatala ai e Ieremia le faatauina o le fanua o lona tausoga o Hanameali le atalii o Saluma le uso o lona tama, e tusa ai ma le fetalaiga a le Atua ia te ia. Faatau le fanua, tusi se tusi, ona faamaufaailogaina lea, e tusa ma le poloaiga ma le tulafono, atoa ma le ua le faamauina, uiga o le tagata na iai le fanua muamua, ma ia tusia foi lalo ma molimau i le faiga o le faatau. O lona uiga o le tele o faasinoala lelei o lo o fau aiga, nuu, ekalesia ma malo, o ala ua uma ona faasino mai e le tusi paia. E le ose poto o le tagata, po o le maemae o le atamai ua tele, leai o mea ua uma o faataatitia e le Atua mo le tagata.  Ua moni ai le upu a Solomona e leai a se mea fou lalo o le la.

E tupu le faatauga lenei o lo o falepuipui Ieremia i totonu o le lotoa a le tupu o Iuta ua le fiafia le tupu o Setekaia ina ua vavalo Ieremia ma faailoa, e tuuina atu e le Alii le aai uma o Iuta i lima o le tupu o Papelonia, e le sao foi Setekaia le tupu i lima o Kaletaia. Ma o lo o siomia le atunuu atoa e le autau a Papelonia. Peitai, o lenei faatauina o le fanua o se faailoga o le faamoemoe, ua faaalia ai e toe foi mai Iuta mai le tafaega ma toe maua o latou fanua i aso o i luma. O le ata vaaia o le Atua alofa e ui lava e faatafea le nuu ona o le tauia o agasala matuia ua faia luma o le silafaga a le Atua, a e agalelei le Atua ma faataunuu ana folafolaga na faia I augatama o le nuu.

Na faia uma e Ieremia taiala na faasino mai e le Atua, ma ua faatino foi le faatauga ma ua faataunuuina, peitai a faaauau pea le faitauga e tusa ma le tusi faitau o lenei aso, ua manino mai ai le manatu o Ieremia sa le tatau ona tupu lenei faatauga. E iloa i lona sai, aua e! le Alii e le Atua, o oe na e faia le lagi ma le lalolagi i lou malosi tele, ma lou aao faaloaloa, e le faigata foi ia te oe se mea tasi.  O le Atua sili ma le malosi, o le Alii o au, o lona suafa lea. Ua silasila ou fofoga i ala uma o tagata. O lona uiga pe a toe faafaigofie le manatu o Ieremia. Le Atua o oe na e faia le lagi ma le lalolagi ma mea o tumu ai, e leai a la se mea e faatau ai se fanua aua o oe na e foafoaina mea uma

Peitai e ese a le mea e manatu iai le perofeta, e ese foi le finagalo o le Atua ma ana fuafuaaga. E iai foi ituaso tatou manatu ai pei o Ieremia, ua tatou taumafai ai e tatalo ma toso mai le taimi ma le finagalo o le Atua i le mea ua tatou loto iai. A e ua uma lava ona tuu e le Atua le taimi ma le mea e tupu ai. Aua o ia lava e silafia mea uma lava. A o leisi lea vaiavaiga o le tagata, a oo na tutupu mea i le taimi ua finagalo iai le Atua, ae sai le tagata ma le fiafia pe afai o se mea ua mafatia ai le ola. A e ua le nofo ma mafaufau i le Atua i le oo mai o luitau. A e oo mai loa o se manuia ma mea ua faamalie ina ai le loto. E lelei a pea manatua le Atua ma lagona le loto faafetai. A e leaga pe afai ua matua galo lava, ina ua oaoa i Faleseu ma sapi i maaomalie.

Fetalai le Atua ia Ieremia, Ioe, o au lava o le Alii, o le Atua o tagata uma, pe faigata ea ia te au se mea tasi? O mea uma ua faamaufaailogaina e le Atua, e leai lava se malosi e mafai ona ia suia, e oo lava le soifua ma le ola o le tagata ua maea ona faamaufaailoagina le Atua. Manatu o se feau faamalosi foi lea mo i tatou i lenei vaiaso o feau ma galuega ua tatou galulue ai, e le o faatauina i tatou ini tupe ma faamaufaailogaina i tatou faatulafono tatou te galulue ai mo galuega ua valaauina ai lo outou soifua, a ua manao e toe faatauese ma manao ai nisi tagata ona fai lea…… Leai.

Ua faatauina i tatou i le alofa tunoa ma le agalelei filifili mai o le Atua, ua valaauina ina ai i tatou ina ia faamaufaailogaina o e ua tautua ma faia feau a le Ekalesia e ala i le Ofisa Tutotonu. Aua lava le manuia o lana Ekalesia aoao, o lona lava lea malo i le lalolagi nei, O le avea o i tatou ma tagata faigaluega i le Ofisa Tutotonu, ua faamaufaailoga lava i tatou o sui vaaia o le EFKS.

E le faatauvaa pe faatauagavale tiute ua tuuina mai, pe ofisa, pe kamuta, pe palama, pe leoleo po foi, ma le tele o valaauina ua valaau ai tatou, o valaauina uma lava mai le Atua. E taua lo tatou faamaoni ma faautauta lelei i lo tatou valaauina. Leaga o le mea lea na afaina ai Isaraelu ua le faamaoni i lo latou tiute ua faamaufaailogaina ai latou e le Atua. E leoleo oe e le faamaoni ae faaeaina oe e le faautauta. A o tulituli e Saulo Tavita e faaoo iai le oti.  Fai mai sa faautauta foi Tavita i lana amio uma; sa ia te ia foi le Alii. Ua vaai Saulo ua matua faautauta o ia, ona fefe ai lea o ia ia te ia. Ua lava a lou faautauta e fefe ai le fili.

E iai taimi tatou te sai ai, pe oo mai luitau ma fita e fesouaina ai le soifua galulue, ia mau pea le toovae ma ia lava le onosai, e folau ai taimi loua o le ola, aua nei galo e iai pea le Atua i taimi uma ma mea uma. E le o tuulafoaina e ia lo tatou ola. E mafai foi ona avea luitau ma tiga o le ola e mafanafana ai la tatou mafutaga ma le Atua.

Iesu Keriso o le alo pele o le Atua, na faamaufaailogaina e le Atua, e fai ma Faaola o le lalolagi agasala. E ala i lona soifua atoatoa na ofoina mai. Na maliu ai ma tanumia i le tuugamau, ae o lona soifua manumalo mai le oti, ua faamafaailogaina ai le tagata i le ola e faavavau pe afai e talia ma salamo faamaoni ia te ia.

Tumau atu le Atua lona viiga nei seia oo le faavavau Amene.

                                                                                                               Rev. Fiaalii Mafuolo (FS)  

                                                                                                                                                                  ………………………………………